Латышскі нападнік Элвіс Жэлубоўскіс, які нядаўна сышоў з “Гомеля”, за які выступаў з пачатку бягучага чэмпіянату, распавёў у інтэрв’ю выданню Sportacentrs.com пра прычыны свайго сыходу. Па словах нападніка ён быў вымушаны пакінуць каманду з-за канфлікта з галоўным трэнерам Андрэям Скабелкам.

“У снежні я паехаў са зборнай Латвіі на кантрольныя матчы супраць Даніі. Скабелку мабыць не спадабалася, што я не застаўся ў Гомелі і не браў удзелу ў трэніроўках. Пасля перапынку я ўжо гуляў толькі ў некаторых асобных матчах“, – падае словы нападніка выданне. “Я размаўляў з кіраўніцтвам клубу і мы разам вырашылі, што лепей будзе мне сысці. Раней, калі галоўным трэнерам быў Аляксандр Андрыеўскі, я рэгулярна ўдзельнічаў у матчах. Але потым, калі ён перайшоў у “Дынама-Мінск”, а каманду прыняў Андрэй Скабелка, давяраць мне сталі значна меней“, – дадаў ён.

23-гадовы нападнік хутчэй за ўсё працягне сваю кар’еру ў адным з іншых клубаў Беларусі. “Ёсць прапановы ад двух камандаў, але ў іх праблема з грашыма. Таксама мой агент шукае варыянты і ў Еўропе, дзе менавіта – я не ведаю“, – сказаў гулец, дадаўшы, што яснасць мусіць быць ужо ў бліжэйшыя некалькі дзён, бо ў беларускай экстралізе набліжаецца апошні тэрмін да якога могуць адбывацца ўсе пераходы (31 студзеня).