Пасля перамогі над зборнай Канады на Кубку Шпенглера нападнік мінскага “Дынама” і зборнай Беларусі Яраслаў Чупрыс даў кароткае інтэрвію афіцыйнаму сайту турніру. У матчы, які скончыўся з лікам 4:3 на карысць беларускага клубу, Яраслаў аддаў дзве галявыя перадачы, а таксама закінуў пераможную шайбу.
- Гэта – вялікая перамога для нашай каманды. Канада – гэта заўсёды Канада і ня мае розніцы хто грае за яе: ці-то хлопцы з Еўропы, ці тыя, хто гуляе ў НХЛ. І я вельмі рады, што мы ў змозе выйграць такую каманду.
- Вы насамрэч сёння былі лепшымі, ці проста вашай камандзе больш пашанцавала?
– Я магу сказаць, што мы гулялі сёння добра, безумоўна, што таксама і ўдача была на нашым баку. Але я лічу, што гэта асаблівай розніцы ня мае: вы можаце бачыць лічбы 4-3 (паказвае на табло). Гэта насамрэч вялікая перамога і мы вельмі задаволеныя гэтым.
- У вас адзін гол і дзве перадачы. Выходзіць так, што турнір для вас складваецца файна.
– Так, гэты турнір сапраўды добра складваецца для мяне. Учора я закінуў шайбу, сёння таксама. Добрыя партнёры, добрыя галы, добрыя гульні. Спадзяюся, так жа добра будзе і надалей у КХЛ.
- Вы граеце пад 68-м нумарам на спіне. Гэта нумар Яраміра Ягра. Вы выбралі гэты нумар з-за чэха?
– Не. Мяне ўжо шмат разоў пыталі, чаму я гуляю пад 68-м нумарам. Але гэта не з-за таго, што Ягр гуляе пад такім жа нумарам. Я нават ня ведаю, як сказаць… Гэта проста нумар і ўсё!
- Канадцы гулялі сёння ў сілавы хакей, але вы, здаецца, ня мелі праблемаў з гэтым?
– Так. Яны вялізныя і моцныя хлопцы, якія гуляюць на добрых хуткасцях. І гульня была складаная, шмат было адзінаборстваў. Але наша каманда сёння добра сябе праявіла. Мы закінулі вельмі патрэбную шайбу – другую, калі лік быў 1-1 – затым яшчэ адну і зрабілі лік роўным 3-1. Гэта была ўдача для нас. Мабыць мы проста хацелі перамагчы больш, чым яны.
- У наступнай гульні на гэтай арэне за выхад у фінал «Мангейм» будзе гуляць супраць «Давоса». Якую каманду вы б хацелі сустрэць у вырашальным паядынку?
– Гэта ня мае ніякай розніцы! Мы прайгралі «Давосу», выйгралі ў «Мангейма». Напэўна, ня мае розніцы з той ці гэтай камандай гуляць. Але было б класна сустрэцца з «Давосам» у фінале і ўсё ж перамагчы і іх.
ФОТА: spenglercup.ch
