Паядынак замежных каманд не выклікаў такой бурнай цікавасці, як матч з удзелам нацыянальнай зборнай роднай краіны, але гэта цалкам зразумела. А гульня была досыць цікавай і сапернікі паказалі вельмі хуткі і яскравы хакей.

Пачатак  сустрэчы падараваў масу захапляльных і небяспечных момантаў. Аднак рэалізаваць прадстаўленыя магчымасці ніхто так і не змог. Датчане былі  злёгку цяжкаватыя на ўздым, а вось аўстрыйцы паводзілі сябе  значна болей упэўнена і літаральна «лёталі» па лёдзе. У канчатковым выніку гэта вылілася ў перавагу па кідках па варотах больш чым ў тры разы.

У другой дваццаціхвілінцы гэта, несумнеўна, прынесла свае дывідэнды. На 26-ай хвіліне аўтарам першага гала стаў Давід Шуллер, а на 33-яй павялічыць разрыў у ліку здолеў Ёханэс Кірызітц. Пасля закінутых шайбаў, здавалася, што датчане разварушыліся, сталі ствараць небяспечныя контратакі, але выніку не было.

Кульмінацыя  гэтай сустрэчы – безумоўна трэці перыяд, які таксама быў насычаны яскравымі эмоцыямі. На 47-ай хвіліне матчу яшчэ пра адну шайбу ў варотах Фрэдэрыка Андэрсана паклапаціўся Міхаэль Шыхль. Аднак аўстрыйцам так і не атрымалася сысці сухімі з гульні. Шайбу «ў распранальню» аформіў абаронца зборнай Даніі Мадс Бёдкер,  які нарэшце здолеў рэалізаваць такую адчувальную перавагу сваёй каманды ў трэцім перыядзе.

Нягледзячы  на такі няўдалы выступ  датчан, заўтрашні паядынак абяцае  быць вельмі цікавым, бо менавіта Даніі саступілі беларусы на чэмпіянаце свету летась, прычым гэты паядынак быў адным з самых лепшых!

Алена СЕМУЦЕНКА