Добры турнір, які стартаваў чатыры гады таму, сёлета наведаў і горад Бабруйск. Задаволеныя гледачы дружнымі шэрагамі пачалі набліжацца да Лёдавай арэны яшчэ за некалькі гадзін да пачатку матчу. Гэта і нядзіўна – турнір такога ўзроўню абяцаў быць даволі відовішчным і цікавым.

У першым перыядзе сілы сапернікаў былі прыкладна роўныя. Абедзве каманды стваралі небяспечныя моманты, аднак беларускай зборнай пашанцавала болей – на 17-ай хвіліне вароты аўстрыйцаў распячатаў Дзмітрый Корабаў.

Сярэдзіна сустрэчы стала больш насычанай і багатай на галявыя моманты. На 22-ой хвіліне матчу пры дапамозе Ўладзіміра Дзянісава і Сяргея Задзялёнава вароты саперніка атакаваў Іван Усенка, а праз дзве з паловай хвіліны пажар поруч варот галкіпера аўстрыйскай зборнай з новай сілай аднавіў Яраслаў Чупрыс, зрабіўшы лік у матчы пагрозлівым (0:3). Варта прызнаць, што каманда Аўстрыі зусім не збіралася апускаць рукі і з зайздроснай сталасцю працягвала ствараць непрыемныя моманты ў варот Віталя Коваля, адзін з якіх і прывёў да змены ў ліку – дакладным кідком вызначыўся  дэбютант зборнай Марка Пэваль. А праз тры хвіліны чарговую радасць беларускім заўзятарам даставіў Андрэй Антонаў, зрабіўшы рахунак у матчы 1:4.

Калі першая і другая траціна матчу запомніліся галявымі момантамі і небяспечнымі кідкамі па варотах галкіпераў, то апошняя дваццаціхвілінка вызначылась амаль толькі шматлікімі выдаленнямі. Некалькі разоў камандзе Аўстрыі падаваўся файны шанец абгуляць саперніка, гуляючы ўпяцёх супраць траіх беларусаў. Адным з такіх момантаў і скарыстаўся Даніэль Оберкофлер, які і ўсталяваў канчатковы лік у матчы.

Нягледзячы на некаторыя праблемы пры рэалізацыі, добры пачатак турніру для Нацыянальнай зборнай Беларусі.

Алена СЕМУЦЕНКА