“Сокал” выйшаў на гульню супраць менскіх “цмокаў” у рангу фаварыта. Такога не было мабыць з часоў ВЕХЛаўскіх баталій, калі гульні гэтых каманд насілі прынцыповы характар. Калі верыць аднаму са спартовых сайтаў, у Кіеве ў заўзятарскім асяроддзі дагэтуль засталася прымаўка: “Это знают все вокруг – “Керамин” наш лучший друг!”. Мабыць,пацверджаннем гэтага радка, можа стаць сённяшняе прадстаўленне стартавых пяцёрак, калі менскія заўзятары сустрэлі гульца ўкраінскага клуба Рамана Сальнікава, які правёў некалькі бліскучых сезонаў у складзе менскай каманды, бурнымі авацыямі.

“Сокал” з першых хвілін сустрэчы, абсадзіўшы вароты мінчукоў, даў зразумець, што нават у выязных сустрэчах не збіраецца гуляць ад абароны. “Цмокі” ж, акрыяўшы ад стартавага прэсінгу, адказвалі вострымі контратакамі і былі, прынамсі чатыры разы, блізкія да поспеху, тады як кіеўскія хакеісты, хоць і валодалі тэрытарыяльнай перавагай, галявымі момантамі пахваліцца не маглі.

Другі перыяд стаў поўным адлюстраваннем першага, з той толькі розніцай, што гледачы ўсёткі пабачылі закінутыя шайбы. Раман Малоў змог рэалізаваць большасць, праўда галоўнаму арбітру сустрэчы Віктару Пляцу, для канстатацыі дадзенага факту прыйшлося звярнуцца да сістэмы відэапрагляду. У час, што застаўся да канца перыяду, каманды абмяняліся дакладнымі кідкамі, захаваўшы інтрыгу на трэці адрэзак гульні.

Майстэрства прыезджых хакеістаў, нягледзячы на нерэалізаваны Сальнікавым буліт, асабліва ярка выявілася ў трэцім перыядзе. Пісьменна выбудаваўшы лінію абароны, госці штораз “гасілі” спробы мінчукоў зраўняць лік сустрэчы, часам перарываўшы іх у самым “зародку” перахопамі шайбаў каля сваіх варот. Адзін з такіх перахопаў стаў для “Кераміна” фатальным: былы НХЛ-авец Сяргей Варламаў уцёк «адзін у нуль» з Андрэем Царовым і не пакінуў апошняму ніякіх шанцаў, тым самым паставіўшы ў матчы прыгожую кропку.

Калі, некаторыя беларускія заўзятары і сумняваліся, з нагоды накіраванасці “Сокала” на пастамент адкрытага чэмпіянату РБ па хакеі, то пасля візіту кіеўлян у Менск, іх быць не можа. “Сокал” – гэта сур’ёзна!

Аляксандр СЕУКАНД (галоўны трэнер ХК “Сокал”):
Цяжкая гульня. Папярэджваў хлопцаў, што будзем біцца з фіналістам Кубка. А ў фінал, як вядома, так проста не выходзяць. Перамаглі ў тым ліку і дзякуючы нашым заўзятарам [група з чалавек 20-30 прысутнічала на матчы - прым. рэд.]. Прахадных гульняў у чэмпіянаце не будзе, трэба выкладвацца па поўнай “праграме”. У Кіеве да нас далучацца астатнія гульцы. Афіцыйна нам задачу пакуль не ставілі, але будзем гуляць у кожным матчы толькі на перамогу.

Сяргей ПЕТУХОЎ (галоўны трэнер ХК “Керамін”):
Мы зрабілі шмат памылак, якія прывялі да ўзяццяў нашых варот. Хачу павіншаваць свайго калегу. Майстэрства хакеістаў “Сокала” вышэй, а мы, на жаль, свае моманты не рэалізавалі.
Глебаў пачуваецца выдатна. Не гуляў? Проста ў нас ёсць і іншыя гульцы. Паўлушыным пакуль задаволены. У адрозненні ад Караульшчука, які нам не падыйшоў.

Дзмітрый БЯЛОЎ
ФОТА: Віталь ХАЦУК, Дзмітрый БЯЛОЎ