Рыжскае “Дынама” падпісала кантракты з трыма гульцамі, якія знаходзіліся ў камандзе на праглядзе. Імі сталі нападнікі Андрыс Джэрыньш і Робертс Букартс, а таксама абаронца Оскарс Цыбульскіс, паведамляе афіцыйны сайт латвійскай каманды. У сваю чаргу, яшчэ адзін нападнік, які быў на праглядзе – Роберт Якімаў, паспрабуе ў гэтым сезоне замацавацца ў складзе аднаго з клубаў Фінляндыі.

Андрыс Джэрынш

Андрыс Джэрыньш і Робертс Букартс былі абраныя рыжскім “Дынама” на драфце КХЛ. Джэрыньш правёў з камандай увесь падрыхтоўчы цыкл і сваімі стараннем і зацятасцю даказаў трэнерскаму штабу, што ён – гулец асноўнага складу клубу. Гэты сезон, будзе для маладога форварда першым у дарослым хакеі.

Робертс Букартс

Робертс Букартс з’яўляецца адным з лідэраў зборнай Латвіі U-20. Да “Дынама” ён далучыўся незадоўга да пачатку трэніравальнага лагера каманды ў Швецыі. Мінулы сезон Робертс правёў у камандзе Вышэйшай Лігі Расіі – “Крылах Саветаў” (Масква). На дадзены момант форвард знаходзіцца ў размяшчэнні “Дынама Юніёрс”, але на працягу сезона, у яго напэўна будзе магчымасць паказаць сябе ў галоўнай камандзе.

Оскарс Цыбульскіс

Оскарс Цыбульскіс апошнім прыбыў на прагляд у латышскую каманду. У мінулым сезоне ён абараняў колеры аўстрыйскага клуба “ECSalzburg Red Bull”, дзе яго партнёрам быў яшчэ адзін пачатковец рыжскага “Дынама” – амерыканскі абаронца Лі Свэт.