Сёння ноччу адбыўся таварыскі матч каманд галоўнай юніёрскай лігі Квэбека (QMJHL) “Манрэаль Джуніёрс”, за які гуляе Яўген Саламонаў, і “Валь-д’Ор Фарорс”. Матч скончыўся з лікам 4-3 (1-1, 0-1, 3-1) на карысць “Манрэаля”.

Выхаванец гомельскай хакейнай школы Яўген Саламонаў зрабіў два кідкі па варотах, з якіх адзін стаў галявым. Гол на 19-й хвіліне матчу, закінуты ім у большасці, стаў першым на рахунку “Манрэаля”. Акрамя таго Саламонаў вызначыўся 2 хвілінамі штрафнога часу, якія Яўген зарабіў за дзве хвіліны да свайго гала.

Сёння “Манрэаль Джуніёрс” правядзе на сваёй арэне яшчэ адзін таварыскі матч. На гэты раз іхным сапернікам стане “Бэй-Камю Дракар”. Пачатак матчу а 02:35 па беларускім часе.

Першы афіцыйны матч рэгулярнага чэмпіянату QMJHL каманда Саламонава згуляе 11 верасня ў гасцях супраць “Шоўніган Катарактс”.