Моладзевая зборная Беларусі ў трэці раз стала пераможцам турніру памяці Сяргея Жолтака, які на працягу пяці гадоў штогод праходзіць у Рызе.

У першым матчы турніру нашы землякі сустракаліся з камандай “Дынама-Юніёрс”, якая ёсць фарм-клубам латвійскага прадстаўніка ў КХЛ – рыжскага “Дынама”. Узмацніўшыся перад турнірам хакеістамі з галоўнай каманды, “Дынама-Юніёрс” атрымала перамогу з рахункам 4:1. Адзіная шайба нашай зборнай на рахунку Вячаслава Макрыцкага.

У другім матчы нашым хлопцам супрацьстаяла зборная Даніі. Гэтым разам Фартуна была да нас больш добразычлівая. Дзякуючы шайбам Вячаслава Макрыцкага і Аляксандра Качана, наша зборная змагла атрымаць перамогу. Рахунак матчу – 2:0.

У вырашальным матчы турніру беларусы сустракаліся з гаспадарамі – зборнай Латвіі. Валодаючы ініцыятывай на працягу ўсёй гульні, беларусы здабылі перамогу з рахункам 3:1. Аўтарамі галявых кідкоў сталі Сяргей Маляўка, Аляксандр Сёмачкін і Аляксандр Абухоўскі.

Нападнік беларускай зборнай Мікіта Рэмезаў быў прызнаны арганізатарамі спаборніцтваў лепшым форвардам турніру.

Вынікі турніру падвёў галоўны трэнер беларускай “маладзёжкі” Васіль Спірыдонаў: “У большай ступені я задаволены не агульнай перамогай, а тым духам, байцоўскімі якасцямі, якія прадэманстравалі хакеісты. Наша каманда, на мой погляд, паказала даволі відовішчны хакей. У мяне няма прэтэнзій ні да аднаго з хакеістаў“, – сказаў настаўнік зборнай.