Да апошняга хадзілі чуткі пра магчымасць таварыскай гульні “гарнякоў” са сваім старэйшым братам ХК “Дынама-Менск”, аднак штосьці не зраслося і напярэдадні дня горада Салігорска ў святочнай таварыскай гульні сышліся каманды “Шахцёр” і “Гомель”.

Трэба сказаць, што трэніроўка ў цэлым атрымалася не ў карысць госцяў, аднак у першым жа сваім асэнсаваным нападзе гамяльчане адкрываюць рахунак. Шайбу забіў Дзмітрый Рудак. Госці працягвалі атакаваць. Здавалася, што свята будзе прыпсаваным, аднак брамнік гарнякоў Міка Окса быў на вышыні і ў складаных сітуацыях дзейнічаў бездакорна. Час ішоў, гульня выраўнавалася, ну а апошняя пяціхвілінка засталася ўжо за “Шахцёрам”. Гарнякі вызначыліся двойчы: спачатку рэалізуючы большасць, шайбу закінуў Яраслаў Чупрыс, а ўжо ў роўных складах вывеў каманду наперад Яўген Кавыршын.

У другім перыядзе ішла роўная гульня. Маглі забіць і госці, але для якаснай гульні ім чагосьці бракавала. У адным з момантаў салігорцы засталіся ўтрох супраць пецярых гульцоў “Гомеля”, але большасць рэалізаваць не змаглі. Гаспадары ж, наадварот, праз некалькі хвілін у большасці адказалі шайбай Віктара Андрушчанкі. Пад канец перыяду хуткая і відовішчная контратака атрымалася ў гарнякоў. Мялешка аддаў на Чупрыса, той прамазаў з забойнай пазіцыі. Шайба ад борціка патрапіла на клюшку Задзялёнаву і той зноў вярнуў яе да Чупрыса. З другой спробы Яраслаў быў больш дакладным.

Трэці перыяд прайшоў ужо не ў такім напале, госці дагульвалі матч, памыляліся ў перадачах і правальваліся ў абароне. У выніку рахунак матчу дайшоў да буйнага 7-2.

Жадалася б адзначыць, што па першых двух перыядах гамяльчане глядзеліся цалкам нядрэнна, момантамі нават цвёрда, у цэлым арганізавана і ацэньваючы таварыскі характар сустрэчы выкажам здагадку, што ў чэмпіянаце гарнякам прыйдзецца нашмат цяжэй.

“Шахцёр” жа за яркі атакавалы і змястоўны хакей заслужыў авацыі нешматлікіх, але ўжо адданых заўзятараў.

ШАХЦЁР (Салігорск) – ГОМЕЛЬ 7:2 (2:1, 2:0, 3:1)
29.08.2009@14:00. Салігорскі лядовы палац, 300 гледачоў.
СУДДЗІ: Яраслаў Заўгародні, Максім Сідарэнка, Іван Дзядзюля, Дзмітрый Галяк.
СКЛАДЫ:
ШАХЦЁР: Окса; Шынкевіч, Шафарэнка, У. Міхайлаў, В. Андрушчанка, Дзямкоў, Мялешка, Задзялёнаў (к), Сырэй, Шведаў, Башко, Сушко, Кукушкін, Камбовіч, Дудзік, Антонаў, Кавыршын, Разанцаў, Антоненка, Чупрыс. Галоўны трэнер: Андрэй Гусаў.
ГОМЕЛЬ: Брыкун; І. Усенка – Якушын, Колосаў – А. Усенка – Мусіенка; Філічкін – Копаць, Бабкоў – Пчэлякоў (к) – Есаулаў; Масленікаў – Шагаў, Ц. Філін – Жыдкіх – Рудак; Хозаў, Я. Філін – Арджэванідзэ – Кашэвіч. Галоўны трэнер: Аляксандр Андрыеўскі.
ГАЛЫ: 01:13 0-1 Рудак (Я. Філін, Жыдкіх); 15:55 1-1 Чупрыс (Мялешка, Сырэй – больш.); 17:392-1 Кавыршын (Шафарэнка, Андрушчанка); 32:413-1 Андрушчанка (больш.); 33:134-1 Чупрыс (Задзялёнаў); 45:55 4-2 Арджэванідзэ (Копаць, Шагов); 48:21 5-2 Мялешка (Башко, Чупрыс – больш.); 51:26 6-2 Дудзік; 57:45 7-2 Дзямкоў (Антоненка).

Міхаіл ДАЙЛІД