Сёння ў Салігорску сустракаліся дзве лепшыя каманды кубка Беларусі – сталічныя “Керамін” і “Юнацтва”.

Гульня пачалася з нападаў гульцоў “Кераміну”. Спачатку не выкарыстаўшы большасць, выгодны момант выпусціў Аляксей Пярмякоў, затым выйсце адзін у адзін не рэалізаваў Дзяніс Лобашэў.

Паступова “Юнацтва” перахапіла ініцыятыву, далёкія кідкі Якімовіча і Курыліна, а затым гол у большасці лепшага гульца матчу, дарэчы экс-керамінаўца, Аляксея Дзяніскіна. “Керамін” на апошніх хвілінах першага перыяду адгыркнуўся ў некалькіх нападах, але да ўзяцця варот гэтыя спробы не прывялі.

Другі перыяд пачаўся без яркіх нападаў. Рэдкія спробы дабрацца да варот Сяргея Шабанава (далёкім кідком вызначыўся ўсё той жа Пермякоў, а праз дзве хвіліны яго ж кідок ва ўпор) маглі бы зраўняць лік, аднак “Юнацтва” не стала раскідвацца момантамі. Дальні кідок Сяргея Шэлега, удала падстаўленая клюшка Аляксандра Мацярухіна і лік у матчы становіцца 2-0 на карысць “Юнацтва”. Далей увесь перыяд праходзіў пад акампанемент нападаў каманды Міхаіла Захарава.

На першай жа хвіліне трэцяга перыяду “Кераміну”, які быў вымушаны гуляць ў няпоўным складзе, не пашчасціла захаваць свае вароты ў недатыкальнасці. Шайба на рахунку Канстанціна Захарава. “Керамін” схамянуўся і індывідуальнымі высілкамі Аляксея Страхава, які кінуў у блізкі кут з сярэдняй дыстанцыі, скарачае рахунак.

“Юнацтва” аддало ініцыятыву і дзейнічала галоўным чынам ад абароны. “Керамін” жа ў некаторых момантах дзейнічаў зусім небяспечна, але да ўзяцця варот так і не дайшло. Апошнія секунды матчу прайшлі пад аглушальны свіст заўзятараў “Юнацтва”. Ведучы ў рахунку на працягу ўсяго матчу, “Юнацтва” атрымала перамогу і заслужана стала ўладальнікам Кубку Беларусі.

Застаецца дадаць, што хоць каманды і ўспрымаюць кубак як перадсезонны турнір, але ў вачах прайграўшых было шчырае расчараванне, а ў вачах пераможцаў – такая ж шчырая радасць.

КЕРАМІН-МЕНСК – ЮНАЦТВА-МЕНСК 1:3 (0:1, 0:1, 1:1)
19.08.2009@18:30. г. Салігорск, Спартова-відовішчны комплекс, 1300 гледачоў.
СУДДЗІ: Уладзімір Налівайка, Максім Сідарэнка, Дзмітрый Галяк, Іван Дзядзюля.
СКЛАДЫ:
КЕРАМІН: Цароў; Шыпіла – Плотнікаў, Страхаў (к) – Пермякоў – Ігошын; Глебаў – Чарнавок, Варашылаў – Баукін – Цярэшка; Шульга – Эберт, М. Міхайлаў – Сёмачкін – Лабашоў; Завалаў – Панамароў – Хафізаў. Галоўны трэнер – Сяргей Петухоў.
ЮНАЦТВА: Шабанаў; Лявонцьеў – Якімовіч, Курылін – Бараўкоў – К. Захараў; Баранаў – Дзяніскін, Мацярухін – Сянькевіч – А. Цімчанка; Карэў – Шэлег, Слыш (к) – Кітараў – А. Сцяпанаў; Клачкоў – Каролік – Раманенка. Галоўны трэнер – Міхаіл Захараў.
ШАЙБЫ: 07:36 0-1 Дзяніскін (Слыш, Сцяпанаў – больш.); 30:30 0-2 Мацярухін (Шэлег, А. Цімчанка); 40:46 0-3 К. Захараў (Лявонцьеў, Якімовіч – больш.); 41:31 1-3 Страхаў.
БРАМНІКІ: Цароў (00:00-60:00 – 85.71%) – Шабанаў (00:00-60:00 – 93.33%).
КІДКІ: 33-20 (4-6, 2-12, 9-3).
ШТРАФЫ: 10-10 (2-2, 4-2, 4-6).
КЕРАМІН:Цярэшка, Плотнікаў, Сёмачкін, Ігошын, Страхаў.
ЮНАЦТВА: Дзяніскін, А. Цімчанка, Бараўкоў, Шэлег, Слыш.
ЛЕПШЫЯ ГУЛЬЦЫ: Аляксей СТРАХАЎ (Керамін) – Аляксандр МАЦЯРУХІН, Аляксей ДЗЯНІСКІН (Юнацтва).

Міхаіл ЗАХАРАЎ (галоўны трэнер ХК “Юнацтва-Менск”):
- Па сутнасці… Два перыяды наогул нядрэнна гулялі. Тры першых выдаленні нас трохі збілі, але перамога цалкам заканамерная. І ўсё ж такі гэты турнір разглядаю толькі як падрыхтоўку да доўгага і няпростага сезону.

 

Сяргей ПЕТУХОЎ (галоўны трэнер ХК “Керамін-Менск”):
- Хацеў бы павіншаваць хакейны клуб “Юнацтва”, гульцоў, трэнераў з добрым пачаткам сезону, з добрай перамогай. Для нас гульня была вельмі цяжкая. У нас ёсць хлопцы, якія не маюць досведу гульні ў матчах такога ўзроўню, таму прапусцілі шайбы ў стандартных простых сітуацыях. Прэтэнзій да сваіх гульцоў увогуле няма. Самааддача была, было жаданне змагацца, перамагаць… Тое што бракуе большасці гульцоў – гэта досведу і майстэрства.

Міхаіл ДАЙЛІД