Матч у Магілёве вырашаў шмат чаго для абедзвюх каманд. Магілёўцам неабходна было абгульваць каманду Сяргея Петухова, каб выходзіць у фінал Кубка датэрмінова (зыход у матчы з “Хімікам” ні на што б не ўплываў) ці прайграваць з розніцай у адну шайбу! Гэта і ўдалося падапечным Сяргея Усанова ў звыш драматычным матчы! Варта заўважыць, што да сённяшняга дня з шасці кубкавых супрацьстаянняў гэтых каманд “Хімвалакно” перамагала толькі аднойчы, у далёкім 2005 годзе, яшчэ адна сустрэча завяршылася ў нічыю.

Ужо з першых хвілін магілёўцы прыняліся ажыццяўляць задуманае, пасля выйгранага ўкідання ў зоне “Кераміну” Віталь Гарбачоў стрэліў ад сіняй, але Андрэй Цароў без асобай працы адбіў гэты кідок! На зыходзе трэцяй хвіліны Іван Сахараў знаходзячыся ў зоне саперніка, робіць перадачу на Андрэя Рамаданаўскага, які выкатваючыся з-за брамкі спрабуе ўразіць блізкі кут Царова, але ж беспаспяхова. Дарэчы, менчукам атрымалася зрабіць свой першы кідок усяго на сёмай хвіліне матчу. Пасля ўкідвання, шайба адлятае да Дзмітрыя Ігошына і той бесперашкодна наносіць кідок па варотах Леаніда Грышукевіча, шайба ў пастцы. Пасля ўкідвання ў сваёй зоне, шайба адскоквае да Івана Сахарава і ў таго без адмысловай працы атрымліваецца заехаць у зону саперніка і зрабіць кідок. Але ўжо ў які раз брамнік мінчукоў пазбаўляе сваю каманду ад немінучай шайбы, чаго нельга сказаць пра ягонага візаві! На чатырнаццатай хвіліне, маючы на аднаго гульца больш, “цмокі” змаглі замацавацца ў зоне і пасля некаторай перапасоўки, менчукі наносяць свой другі кідок, у выніку дзейсны. Глебаў ад сіняй патрапіў у вароты Грышукевіча – 0:1. А праз усяго тры хвіліны “цмокі” адрываюцца ў контратаку “два ў аднаго”. Але патрапіць у вароты адразу не атрымалася, Канстанцін Нікулін знаходзячыся злева ад варот Леаніда Грышукевіча спрабаваў патрапіць у “домік”, але брамнік адбіў шайбу тачнюсенька на клюшку Ірэка Хафізава, з другога дабівання той патрапіў у вароты – 0:2. З адчувальнай перавагай “Кераміна”, каманды сышлі на перапынак.

І не паспеў пачацца другі перыяд, як ужо на старце другой хвіліны “Керамін” наносіць свой чацвёрты кідок па варотах магілёўцаў і той таксама апынуўся дзейсным!!! Ігар Варашылаў ізноў жа ад сіняй патрапіў у вароты – 0:3. Адразу ж рушыла ўслед замена брамніка: замест Грышукевіча месца ў варотах заняў Аляксандр Котаў. І тут ужо пуцёўка ў фінал пачала паволі аддаляцца ад магілёўскай каманды. І ўсё гэта выдатна разумелі. Першым выпраўляць сітуацыю прыняўся навабранец каманды Дзмітрый Хамякоў. Маючы колькасную перавагу магілёўцам пашчасціла замацавацца ў зоне. Бажко адпасоўвае у цэнтр на Дзмітрыя, той ад сіняй патрапляе ў вароты Царова – 1:3.

Але і Котаву не давялося пакінуць сваю “рамку” ў недатыкальнасці. На 13-ой хвіліне Ігошын адпасаваў на Глебава, а той, знаходзячыся ў поўнай адзіноце, ізноў жа ад сіняй лініі, прастрэльвае нізам і другога брамніка гаспадароў. Шайба прайшла пад шчытком – 1:4. Але на зыходзе другога перыяду Сахараў усё ж такі пакараў “керамінаўцаў” за нядбайную гульню ў абароне – 2:4!

Трэці перыяд прыхільнікам магілёўскай лютвы прынёс дваякія ўражанні: хоць “Хімвалакну” і атрымалася закінуць трэцюю шайбу, якая забяспечвала далейшую барацьбу за Кубак, за дзве з паловай хвіліны да канца трэцяга перыяду, але і лазарэт каманды Сяргея Ўсанава папоўніўся на двух нападнікаў. У сутыкненні з Раманам Блохам, Арцём Бажко атрымаў пашкоджанне калена (папярэдне – тыдзень па-за гульнёй), але гэтак жа і супраць Андрэя Рамаданаўскага быў ужыты жорсткі сілавы прыём, пасля якога Андрэй сышоў з пляцоўкі трымаючыся за плячо.

Такім чынам “Керамін”, згуляўшы ўсе свае матчы, скончыў выступ у групавым раундзе Кубку, а “Хімвалакну” будзе наданы шанец пабіцца за пуцёўку ў фінал у суботу ў Наваполацку.

ХІМВАЛАКНО (Магілёў) – КЕРАМІН-МЕНСК 3:4 (0:2, 2:2, 1:0)
12.08.2009@18:30. Лядовы палац “Магiлеў”, 2100 гледачоў.
СУДДЗІ: Максім Сідарэнка, Аляксандр Запольскі, Андрэй Кузьмінскі, Васіль Каляда.
СКЛАДЫ:
ХІМВАЛАКНО: Грышукевіч, Котаў; Летаў – Касцюхін, Р. Магдзееў – Куцэвiч – Баразенка (к); Сальнiкаў – Цвяткоў, Царэгародцаў – Рамаданаўскi – Сахараў; Гарбачоў – Хамякоў, Блох – Iльiн – Бажко; Гаранiн – Раманаў, Лабкоў – Тамiлiн – Марашчонак; Галоўны трэнер: Сяргей Усанаў.
КЕРАМІН: Цароў; Плотнікаў – Шыпіла, Ігошын – Пермякоў – Страхаў (к); Чарнавок – Глебаў, Церашко – Баукін – Варашылаў; Эберт – Шульга, М. Міхайлаў – Сёмачкін – Лабашоў; Хафізаў – Нiкулiн – Завалаў. Галоўны трэнер: Сяргей Петухоў..
ГАЛЫ: 13:390-1 Глебаў (Варашылаў – больш.); 17:41 0-2 Хафізаў (Нiкулiн); 21:010-3 Варашылаў (Пермякоў, Ігошын); 28:18 1-3 Хамякоў (Бажко – больш.); 32:24 1-4 Глебаў (Ігошын – больш.); 37:50 2-4 Сахараў (Сальникаў); 57:53 3-4 Блох (Царэгародцаў – больш.).
БРАМНІКІ: Грышукевіч (00:00-21:01 – 25.00%), Котаў(21:01-60:00- 95,24%) – Цароў (00:00-60:00 – 95,83%).
КІДКІ: 24-21 (8-3, 8-9, 8-9).
ШТРАФЫ: 10-14 (2-4, 4-8, 4-2).
ХІМВАЛАКНО: Сахараў – 4; Царэгародцаў , Куцэвiч, Магдзееў.
КЕРАМІН: Шульга – 8; Страхаў, Пермякоў, Шыпіла.
ЛЕПШЫЯ ГУЛЬЦЫ: Іван САХАРАЎ (Хiмвалакно) – Андрэй ГЛЕБАЎ, Андрэй ЦАРОЎ (Керамiн).

Сяргей ПЕТУХОЎ (галоўны трэнер ХК “Керамін-Менск”):
У нас склалася такая сітуацыя, калі перамога не цешыць. Прапушчаная на апошніх хвілінах шайба перакрэсліла шанцы на выйсце ў фінал для каманды і пры дыхтоўнай гульні (на папярэднім этапе, саступілі толькі “Гомелю”), на жаль тут не атрымалася. Хоць, гульня ўдала складалася, але шэраг памылак стварыў сітуацыю, калі розніцы ў шайбу не хапіла. І магілёўскія гульцы добра адпрацавалі ўвесь матч, вытрымалі. Я думаю, што і гледачам гульня спадабалася!

Сяргей УСАНАЎ (галоўны трэнер ХК “Хімвалакно”):
Гульня – працяг ранішняй трэніроўкі. На ранішняй трэніроўцы некаторыя гульцы пачуваліся прывольна, так і працягнулася ў гульні. Калі пачалі добра, было створана шмат момантаў, але ж паставіліся да іх несур’ёзна і брамнік гасцей добра згуляў. Ды і пасля першага гала абаронцы панесліся ў напад, што я спрэс забараняў! “Керамін” добра згуляў на контратаках. Малайчыны, што біліся, але ў выніку гэтага з’явіліся траўмы…
Такі рахунак нас задавальняе, але толькі калі мы выйграем у Наваполацку!

Міхаіл МІЛІШКЕВІЧ
ФОТА: Яўген БАГАМОЛАЎ