Як і чакалася, першы афіцыйны матч сталічных “цмокаў” наведала няшмат гледачоў. Магчыма, галоўным чыннікам паслужыў барысаўскі “БАТЭ”, які ў гэты ж час ваяваў за выйсце ў чацвёрты кваліфікацыйны раунд Лігі чэмпіёнаў (трансляцыю можна было ўбачыць па тэлебачанні). А шкада, свой стартавы матч 9-го кубка РБ па хакеі менская лютва правяла “на ўра”.

З першых хвілін наваполацкім хакеістам нічога не заставалася рабіць, як прыціснуцца да сваіх варот і штораз рабіць пракіды. Мабыць паразы ў таварыскіх матчах парадкам «надакучылі» камандзе Сяргея Петухова і ў афіцыйным матчы перад роднай публікай менчукі паўсталі зусім у іншым святле. Хвацкія напады адзін за адным накатваліся на вароты Віталя Труса, аднак “распячатаць” яго “керамінаўцы” змаглі толькі на восьмай хвіліне. Першы ж небяспечны момант у варот мінчукоў паўстаў толькі ў канцы перыяду – Андрэй Цароў быў на вышыні.

Другі перыяд, апроч гульнявой перавагі, дадаў “Кераміну” дывідэндаў у выглядзе галоў. Ды яшчэ якіх! Асоба варта адзначыць троххадоўку Ігошын – Панамароў – Варашылаў. Апошні эфектна «паклаў» шайбу ў левы ад Труса кут варот. Трэці ж перыяд прайшоў пад класічную формулу: “адны не жадаюць – другія не могуць”. Аднак, нават пры гэтым раскладзе “цмокі” былі не раз за крок ад чарговага поспеху. Ну а “хімікі” амаль што і ня мелі магчымасці “размачыць” Царова, а потым і маладога Валера Проніна, які заняў месца ў “рамцы” на экватары перыяду.

Мабыць адзіны, каго можна адзначыць у складзе прайграўшых – Яўген Філипчык, які заняў месца на апошнім рубяжы ў трэцім перыядзе. Што да пераможцаў, вылучыць кагосьці асабіста было вельмі цяжка. Прэтэндэнтаў на званне “лепшага гульца матчу” было прынамсі на дзве пяцёркі – лаўры ж падзялілі Аляксей Пермякоў і Аляксей Страхаў.

КЕРАМІН (Менск) – ХІМІК-СКА (Наваполацк) 5:0 (1:0, 4:0, 0:0)
05.08.2009@18:30. Менскі лядовы палац, 560 гледачоў.
СУДДЗІ: Яраслаў Заўгародні, Пётр Амосаў, Мікалай Разумовіч, Дзмітрый Шабуневіч.
СКЛАДЫ:
КЕРАМІН: Цароў, Пронін; Плотнікаў – Шыпіла, Ігошын – Пермякоў – Страхаў (к); Чэрнавок – Глебаў, Караульшчук – Панамароў – Варашылаў; Эберт – Еронаў, Н. Міхайлаў – Сёмачкін – Лабашоў; Ероха, Хафізаў – Баукін – Завалаў. Галоўны трэнер: Сяргей Петухоў.
ХІМІК-СКА: Трус, Філіпчык; Пераверзеў – Магераў, Маліноўскі – Пільноў – Мароз; Глінкін – Скрыпілёў, Крыкуненка – Прыгуноў (к) – Камароў; Яскевіч – Клішын, Р. Гарбаконь – Аўдосеў – Карага; Ланавенка – Р. Цвяткоў, Шэрэмецьеў – Катаеў – Менцюк. Галоўны трэнер: Сяргей Пушкоў.
ГАЛЫ: 07:13 1-0 Пермякоў (Еронаў, Эберт); 22:45 2-0 Глебаў (Страхаў – больш.); 33:19 3-0 Варашылаў (Ігошын, Панамароў); 35:36 4-0 Пермякоў (Страхаў); 39:07 5-0 Эберт (Пермякоў, Страхаў).
БРАМНІКІ: Цароў (00:00-49:32 – 100.00%), Пронін (49:32-60:00 – 100.00%) – Трус (00:00-40:00 – 79.17%), Філіпчык (40:00-60:00 – 100.00%).
КІДКІ: 32-17 (9-6, 15-3, 8-8).
ШТРАФЫ: 10-10 (4-4, 0-2, 6-4).
КЕРАМІН: Шыпіла, Панамароў, Караульшчук, Глебаў, Страхаў.
ХІМІК-СКА: Шэрэмецьеў, Клішын, Крыкуненка, Катаеў.
ЛЕПШЫЯ ГУЛЬЦЫ: Аляксей ПЕРМЯКОЎ, Аляксей СТРАХАЎ (Керамін) – Уладзімір ПЕРАВЕРЗЕЎ (Хімік-СКА).

Дзмітрый БЯЛОЎ