На базе Рэспубліканскага цэнтра Алімпійскай падрыхтоўкі “Раўбічы”, з 1 па 10 жніўня, пройдзе першы збор юніёрскай (да 18 гадоў) зборнай Беларусі. У планах зборнай правядзенне таварыскага матчу з камандай ХК “Гомель” 1992-93 г.н., які адбудзецца 8 жніўня, паведамляе афіцыйны сайт Федэрацыі хакею Рэспублікі Беларусь.

Як стала вядома нашаму карэспандэнту, матч зборнай супраць ХК “Гомель” будзе праведзены з ініцыятывы гомельскага клубу. Пасля публікацыі ў газеце “Прэсбол” складу юніёрскай зборнай шмат хто звярнуў увагу на адсутнасць у камандзе прадстаўнікоў гомельскай хакейнай школы. І гэта вельмі дзіўна, асабліва калі ўлічваць той факт, што гомельскія юніёры пад кіраўніцтвам Эдуарда Валіуліна сталі чэмпіёнамі краіны ў сваёй узроставай катэгорыі. Пасля перамоваў кіраўніцтва гомельскага клубу з прадстаўнікамі ФХРБ і трэнерскім штабам была дасягнутая дамоўленасць пра правядзенне таварыскай сустрэчы паміж юніёрскай зборнай і камандай ХК “Гомель” складзенай з хлопцаў 1992-1993 г. н. У якасці месца правядзення матчу разглядаліся пляцоўка ў Раўбічах і Гомельскі лядовы палац.

11 жніўня зборная пад кіраўніцтвам новага трэнера Ўладзіміра Сафонава адправіцца ў Омск на турнір з удзелам каманд Моладзевай хакейнай лігі (МХЛ). Сярод удзельнікаў турніру моладзевыя каманды омскага “Авангарда”, яраслаўскага “Лакаматыва”, уфімскага “Салавата Юлаева”, чэлябінскага “Трактара” і казанскага “Ак Барса”.

Беларусы правядуць на турніры пяць паядынкаў:
12 жніўня Салават Юлаеў – Беларусь
13 жніўня Трактар – Беларусь
14 жніўня Беларусь – Ак Барс
15 жніўня Беларусь – Авангард
16 жніўня Лякаматыў – Беларусь

Галоўны трэнер зборнай, Уладзімір Сафонаў, выклікаў на збор 30 хакеістаў:
брамнікі: Антон Агрэс (1992, Брэст-2), Артур Лук’янаў (1992, Віцебск-2), Ян Шаляпнёў (1993, Дынама-Менск-3);
абаронцы: Зміцер Жэўлачэнка, Мікіта Мазур, Мікіта Туравец (усе – 1992, Керамін-2), Фёдар Глушкін, Мікіта Кардышаў (абодва – 1992, Юніёр), Аляксандр Д’ячэнка, Яўген Лявонаў (абодва – 1992, Віцебск-2), Уладзіслаў Лямачка, Антон Сурконт (абодва – 1992, Брэст-2), Андрэй Краўчанка (1993, Хімік-2), Раман Грабарэнка (1992);
нападнікі: Ягор Ліннік, Максім Парфеевец, Яўген Самохін, Юры Серакоў (усе – 1992, Керамін-2), Артур Абметка (1992), Станіслаў Лапачук (1992), Дзяніс Далідовіч (1993) (усе – Юніёр), Аляксей Капуза, Ігар Карабанаў (абодва – 1992, Брэст), Яўген Лапікаў (1992, Брэст-2), Ягор Агеенка (1992, Дынама-Менск-3), Арцём Антоненка (1992, Шахцёр), Яўген Дадонаў (1992, Віцебск-2), Віталь Кірушчанкоў (1992, Хімік-2), Руслан Журня (1992, Хімік), Аляксей Скабелка (1992, Гомель-2).

Нагадаем, што на мінулым чэмпіянаце свету сярод юніёраў наша зборная пад кіраўніцтвам Сяргея Пушкова заваявала залатыя медалі ў I дывізіёне і атрымала права ўваходу ў эліту. Чэмпіянат свету ў элітным дывізіёне ў 2010 годзе пройдзе з 13 па 23 красавіка, а прымаць яго будуць Магілёў і Бабруйск.