Чарговай паразай для менскага “Дынама” завяршыўся сёньняшні дзень у КХЛ. Гэтым разам менчукі саступілі маскоўскаму “Спартаку” з лікам 7-4 (1-1, 4-0, 2-3). Такім чынам “бела-чырвоныя” заваявалі тры перамогі ў трох матчах супраць беларускага клюбу.
Пасьля паразы ад “Салавата Юлаева” беларускія хакеісты былі настроеныя перамагчы ў Маскве. Тым больш, што ў апошняй сустрэчы сёньняшніх супраціўнікаў, якая таксама адбылася ў Сакольніках, “дынамаўцы” саступілі толькі ў сэрыі булітаў. Прыемнай навіной для беларускіх заўзятараў стала вяртаньне на пляцоўку нападніка Сяргея Задзялёнава, які адразу ж заняў месца ў цэнтры стартавай пяцёрцы разам з Аляксандрам Кулаковым і Андрэям Міхалёвым.
Некалькі добрых момантаў стварылі на старце матчу абедзьве каманды, але ж і брамнікі пакуль што дзейнічалі надзейна, а часьцяком і кідкі па варотах праходзілі міма. А вось напружаньне на пляцоўцы нарастала з кожнай хвілінай і ўжо на 10-й хвіліне выбухнула бойкай каля дынамаўскіх варот. А вось лік у сустрэчы быў адкрыты толькі на 15-й хвіліне матчу. Пасьля няўдалых спробаў Ружычкі і Дразьдзецкага Эдуард Левандоўскі ўсё ж такі “размачыў” Віталя Коваля. Але ж нечаканы падарунак у выглядзе амаль што двух хвілінаў гульні ў фармаце “пяць на тры”, “дынамаўцы” выкарысталі вельмі хутка. 17 сэкундаў прайшло з моманту другога выдаленьня ў “Спартака”, як Ханнэс Хювэнен амаль што разам з сыгналам на перапынак аднавіў раўнавагу.
Другі пэрыяд нагадаў даўно забытыя часы “Дынама” ў якія пытаньне “хто нам сёньня яшчэ не закідваў?” зусім не здавалася рытарычным. Чатыры шайбы за шэсьць з паловай хвілін – гэта ўжо зусім не сьмешна. Ужо на трэцяй хвіліне Левандоўскі зрабіў дубль, а крыху пазьней па голу на свой рахунак запісалі Максім Рыбін, Раман Людучын і Валеры Пакроўскі. Усе спробы менчукоў хоць неяк выправіць сытуацыю не прынесьлі жаданых вынікаў.
А вось трэцяя дваццаціхвілінка падаравала беларусам слабую надзею на хэппі-энд. Ужо на 44 хвіліне трэнэр гаспадароў быў вымушаны ўзяць тайм-аут. А што яшчэ яму было рабіць, калі спачатку Сяргей Кукушкін, а за ім і Аляксандр Кулакоў усяго за 16 сэкундаў скарацілі адставаньне ўдвая. Але ж і мікраперапынак даў свой плён. Гульня хоць і паскорылася, але ж болей нагадвала першы пэрыяд. Схема “ты – мне, я – табе” адпрацавала так як трэба. Амаль што з роўнымі інтэрваламі было закінута яшчэ тры шайбы і на жаль дзьве зь іх у вароты “Дынама”. Да “дубля” Левандоўскага далучыліся “дублі” Людучына і Хювэнена, ну а шайба Дзьмітрыя Уппэра на 58-й хвіліне стала толькі яшчэ адной кропляй дзёгцю да невялічкага глечыка з “дынамаўскім” мёдам.
Наступны матч “Дынама” правядзе ўжо ў сабе дома 24 студзеня супраць аднаго з лідэраў КХЛ – мыцішчынскага “Атлянта”.
Астатнія матчы дня завяршыліся з наступнымі вынікамі:
| Атлянт – Барыс | 5:1 |
| Амур – Лада | 1:4 |
| Мэталюрг Нк – Ак Барс | 0:2 |
| Сыбір – Нафтахімік | 3:2 |
| Мэталюрг Мг – СКА | 3:1 |
| Салават Юлаеў – Северсталь | 4:3 |
| Дынама М – Віцязь | 6:1 |
| ЦСКА – Хімік | 4:2 |
| Дынама Р – Лякаматыў | 2:1 |
