Пасьля сьвяточнага Дня Падзякі, які адзначаўся ў ЗША ў чацьвер, амэрыканскія каманды вярнуліся на лёд. За акіянам мінулай ноччу было згуляна 11 гульняў.

Вашынгтон – Манрэаль – 3-0

Жазэ Тэадор 28-мю “выратаваньнямі” зарабіў 26-ты “сухі” матч у кар’еры. Са сваім былым клюбам Тэадору давялося сустрэцца толькі ў другі раз. Мінулы быў жудасным: 8 прапушчаных шайбаў ад “канадцаў” 21 кастрычніка ў форме “Каларада”.

Перамога для “капіталістаў-сталічнікаў” стала сёмай запар дома, а агулам за сэзон яны маюць цудоўныя +9=1-0. Калі ж улічыць і гульні мінулага сэзону, то з сакавіка-2008 сэрыя выглядае +15=1-0. А для трэнера Бруса Будро вікторыя стала 50-й з таго часу як ён прыняў “Вашынгтон”. Для гэтага яму спатрэбілася толькі 84 гульні – найлепшы паказчык у гісторыі для “Кэпіталз”. Нагадаем, што да гэтага з камандай працаваў трэнер беларускай зборнай Глен Хэнлан. Так што ў дасягненьні Будро ёсьць і “беларускі” уклад.

Што ж да “канадыенс”, то яны без траўміраваных лідэра атак Алекса Тэнгуэя і тафгая Жоржа Ларака выглядалі неяк зусім блекла. Магчыма, вярнуцца да былога тэмпу “Манрэалю” дапаможа 7-гульнявая хатняя сэрыя гульняў, якая распачнецца ўжо сёньня гульнёй з “Баффала”. Цікава, што ў 100-гадовай гісторыі каманды гэта дамашняя пабыўка будзе самай працяглай за ўвесь час! Наступную гульню на выездзе “канадцы” згуляюць толькі 16 сьнежня.

Фінікс – Каларада – 2-1

Рашаючым фактарам у гульні ў Арызоне, як і ў сталіцы краіны, стала бліскучая гульня брамніка – Мікаэля Тэлквіста, які зрабіў 37 “сэйваў”. Трэнер прайграўшых “лавін”, якія ізноў абыходзіліся без лідэра Джо Сакіка, здолеўшага правесьці толькі адну зьмену ў гульні перад тым як пайсьці ў раздзявальню, Тоні Граната, нягледзячы на паразу, адзначыў: “Калі мы працягнем гуляць так як рабілі гэта сёньня, павінна стаць так, што большасьць разоў перамога будзе даставацца нам”.

“Кайоты” без Олі Ёкінена выйшлі на 50%-вы ўзровень і зараз займаюць 9-ты радок у табліцы канфэрэнцыі.

Статыстыка беларусаў:

Руслан Салей – 24:15, +1, 3 кідкі.
Сяргей Касьціцын – 15:52, 2 хв.
Андрэй Касьціцын – 11:33, -1, 2 кідкі.

Бостан – Ню-Ёрк Айлендэрс – 7-2

У гульні адзначыліся выніковымі баламі адразу 12 “мядзьведзяў”. 2 галы на рахунку Майкла Райдэра.

“Беарс”, прапусьціўшы першымі, не пакінулі шанцаў гасьцям у трэцім перыядзе 5-1. Перамога ў сустрэчы, перад пачаткам якой каманды хвілінай памяці аддалі сваю павагу пайшоўшаму з жыцьця былому настаўніку “Бостна” Арману “Беп” Гвідаліну (82 гады), стала 10-й для гаспадароў у гэтым месяцы, для брамніка Мэні Фэрнандэса – 6-й запар пасьля няўдалага першага зьяўленьня на лёдзе.

Баффала – Піцбург – 4-3

2 галы Сідні Кросбі не дапамаглі “пінгвінам” атрымаць перамогу: упершыню за сэзон яны, выйграючы пасьля двух перыядаў, пакінулі пляцоўку, прайграўшы ў асноўны час (дагэтуль былі 7 перамог і 4 “нічыі”).

Яўген Малкін за лік 2-х асыстэнцкіх балаў павялічыў свой рахунак да 37-мі ачкоў і працягвае знаходзіцца на першым радку ў снайперскай гонцы.

“Шаблі” пасьля файнага старту +8=2-2 замарудзілі тэмп +3=1-6, знаходзячыся зараз за межамі зоны плэй-оф. Пол Гостад (2+0) і Дру Стаффард (2+1) дазволілі крыху наблізіцца да яе.

Дэтройт – Каламбус – 5-3

Госьці толькі 16 разоў кідалі па варотах Крыса Осгуда, але гэта не перашкодзіла ім трымаць у напружаньні трэбуны да сама канца гульні: толькі за 2 хвіліны да сырэны Марыян Хосса падвоіў перавагу, закінуўшы свой другі гол, а за 7 сэкунд да заканчэньня сутрэчы закінуўшы ў пустыя вароты Крыс Дрэйпер зрабіў у меньшасьці лік канчатковым.

Расейскі абаронца “Блю Джэкетс” Фёдар Цюцін, які закідвае зусім ня часта, адзначыўся дублем.

Даллас – Сан-Хасэ – 2-6

Ужо не зьдзіўляе ўпэўнены ход па жыстанцыі “акул”, якія з 39-цю ачкамі зараз узначальваюць лігу і стартавалі лепш за ўсю сваю невялікую пакуль гісторыю. Дадаўшы ўдалымі трэйдамі ў міжсэзонны час парачку добрых абаронцаў, “Сан-Хасэ” закрыла праблемы, з-за якіх давялося разьвітацца ў мінулым сэзоне з плэй-оф. А зараз каліфарнійцы ўжо карыстаюцца пладамі сваёй палітыкі: у гэтай гульні лепшымі ізноў былі прызнаны абаронцы Дэн Бойл (2+0) і Роб Блэйк (1+1), якіх звыкла падтрымаў лідэр атак Джо Торнтан (0+2).

“Зоркі” могуць пакуль напэўна радавацца толькі набліжаючамуся юбілею самага выніковага амэрыканскага хакеіста за ўсю гісторыю хакея Майка Мадана, якому каб стаць 31-м гульцом, пераадолеўшаму адзнаку 1300 набраных ачкоў у НХЛ, не хапае толькі 2 балы.

Фларыда – Ню-Ёрк Рэйнджэрс – 3-4 (бул.)

Мікалай Жэрдзеў голам і вырашальным булітам прынёс цяжкую перамогу, нягледзячы на лідэрства на 3-й хвіліне гульні 2-0, над “пантэрамі”, замацаваўшы “Рэйнджэрс” на лідэрскай прыступцы Ўсходу.

Дэвід Бут, які кідаў за сустрэчу па варотах гаспадароў 8 разоў, аднавіў раўнавагу за 1:33 да сырэны. У сукупнасьці з 43-ма “сэйвамі” Крэйга Андэрсана гэта дазволіла “Фларыдзе” пакінуць апошні радок у канфэрэнцыі, параўняўшыся з прайграўшымі ў Мінэсоце “маланкамі”.

Філядэльфія – Караліна – 2-3 (АТ)

Перарвалася як 6-гульнявая пераможная сэрыя “лётчыкаў”, так і самая працяглая ў кар’еры 9-матчавая выніковая Сімона Ганье (5+11).

Перамога ж “ураганам” дазволіла застацца ў зоне плэй-оф і глядзець наперад з аптымізмам.

Мінэсота – Тампа Бэй – 4-2

Перамога над адным з аўтсайдэраў лігі стала для “дзікіх” першай у сэзоне у сытуацыі, калі яны прайгравалі пасьля двух перыядаў. Іх брамнік Ніклас Бэкстрам зрабіў 35 “сэйваў”.

Анахайм – Чыкага – 1-0

Акрамя “шотаўта” швэйцарца Марціна Хілера гульня адзначылася двума гістарычнымі падзеямі: віншаваньнем згуляўшага нядаўна ў Сэнт-Луісе 1000-ую гульню ў лізе Брэта Хэдзікана і 606-м зьяўленьнем на лёдзе ў кашульцы “Дакс” Цеему Селяне – столькі ж як і Пол Карыя. Больш мае толькі Сьціў Руччын (616), які гуляў за каманды ў сэзоны 1994-2004.

Атланта – Нэшвіл – 3-4

“Нэшвіл” у Атланце не перамагаў з 1999-га году (за гэты час было +0=1-3). Сэрыя перарвалася дзякуючы голу першага выбару “драпежнікаў” на драфце-2003 Раяна Сатэра. За гэты час ён адзначыўся 19 разоў (тры сёлета): “Класнае пачуцьцё! Я думаю, што сёмая гульня Кубка Стэнлі – гэта таксама файна, але і гэты гол будзе для мяне асаблівым”.

Сёньня ў НХЛ пройдзе 12 гульняў. Асаблівую ўвагу з іх прыцягне матч “Бостан” – “Дэтройт”. Беларускія гульцы са сваімі камандамі выйдуць на лёд сваіх гарадоў супраць клюбаў з параўнальнымі са сваімі турнірнымі паказчыкамі: “Таронта” і “Манрэаль” прымуць канкурэнтаў з Філядэльфіі і Баффала адпаведна, а “Каларада” сустрэнецца дома з завязшай на дне сваёй канфэрэнцыі “Тампай”.