Апошнім часам сярод гомельскіх заўзятараў ходзяць чуткі наконт таго, што лепшага бамбардзіра ХК “Гомель” Міхаіла Кліміна і галкіпэра каманды Ігара Брыкуна забірае ў свае лавы менскае “Дынама”, што зараз прадстаўляе Беларусь у Кантынентальнай хакейнай лізе (КХЛ). Апошнім часам менская каманда праводзіць масавую чыстку сярод наяўнага складу і мусіць шукаць новыя штыкі. Каб спраставаць ці наадварот пацьвердзіць чуткі пра пераезд двух гомельскіх гульцоў у КХЛ мы зьвярнуліся да іх за камэнтарыямі.

Міхаіл КЛІМІН (нападнік ХК “Гомель”): “Насамрэч я нічога ня чуў пра тое, што мяне хтосьці запрашаў у “Дынама”. Так і можаце перадаць усім каго гэта цікавіць“.

Ігар БРЫКУН (брамнік ХК “Гомель”): “Што да мяне, дык уласна я ў “Дынама” не зьбіраюся. На мой погляд, калі пайсьці зараз у гэтую каманду ёсьць вялікі шанец сапсаваць свой прафэсійны узровень“.

Міхаіл Клімін зараз з 22 (10+12) ачкамі па сыстэме “гол+пас” падзяляе з нападнікам магілёўскага “Хімвалакна” Андрэям Рамаданаўскім 6-7 радкі ў сьпісе бамбардзіраў беларускай Экстралігі. На ягоным рахунку таксама 12 хвілінаў штрафнога часу. Паказчык карыснасьці Міхаіла Кліміна складае +4.

Ігар Брыкун, які атрымаў запрашэньне да складу нацыянальнай зборнай Беларусі, зараз займае першае месца ў Экстраліге па надзейнасьці (94.2 % у 13 матчах). Прапускаючы ў сярэднім па 1.83 шайбы за гульню (5 паказчык у Экстралізе), ён дапамог “Гомелю” здабыць перамогу ў 11 матчах. Таксама на рахунку 22-гадовага галкіпэра 1 “сухі” матч.